Qobustan Milli Parkı, rəsmi adı ilə Qobustan Qayaüstü İncəsənət Mədəni Landşaftı, Böyük Qafqaz dağ silsiləsinin cənub-şərq ucunu əhatə edən təpəlik və dağlıq ərazidir. Qobustan qəsəbəsinin qərbində, Bakı şəhərinin mərkəzindən təxminən 64 km (40 mil) cənub-qərbdə, Xəzər dənizinin qərb sahilində yerləşir.

1966-cı ildə Qobustan Azərbaycanın milli tarixi abidəsi elan edildi və bu qədim qayaüstü təsvirlərin, artefaktların, palçıq vulkanlarının və qaz daşlarının qorunması məqsədilə mühafizə altına alındı. 2007-ci ildə Qobustan, qaya təsvirlərinin ovçuluq, fauna, flora və ibtidai dövrün həyat tərzini əks etdirən yüksək keyfiyyət və sıxlıqda olması və ərazinin ibtidai dövrlə orta əsrlər arasındakı mədəni davamlılığı əks etdirməsi səbəbindən UNESCO-nun Dünya İrs Siyahısına daxil edildi.

Hazırda Qobustan açıq səma altında bir muzeydir. Hər il bu möhtəşəm incəsənət qalereyasını dünyanın müxtəlif yerlərindən minlərlə insan ziyarət edir. “Qobustan Qayaüstü İncəsənət Mədəni Landşaftı” 2007-ci il 23 iyun - 2 iyul tarixlərində Yeni Zelandiyanın Kraystçörç şəhərində keçirilən Dünya İrs Komitəsinin 31-ci sessiyasında Dünya İrs Siyahısına daxil edildi.